懶咗Ｎ日，今日一於更新下啦。不過都係寫番以前嘅嘢－－中秋啊。

　　講起中秋，自從出咗外省讀書之後，就除咗上年帶咗昊澤兄返廣州過（詳見前面嗰篇廣州札記［轉］），就好似沒點喺屋企過了。今年出咗嚟做嘢，又係沒得喺屋企過。無辦法啦，都係做嘢緊要吖嘛，而且仲可以睇下外國嘅月亮究竟係唔係特別圓嘅添。

　　喺蘇丹，我哋公司大概有成７０個人，減咗喺Khartoum出面做嘢嘅人之後，大概都有成４０個人係喺公司過中秋嘅。雖然大家都係身在異鄉，不過難得有咁多人，總算都叫做可以熱熱鬧閙咁過了。

　　因爲中秋都要返工，所以從返工開始就盼放工。幾辛苦等到有得提早放工，就即刻快快趣返到白宮嗰邊幫手準備晚飯Ｄ嘢同埋晚會Ｄ嘢。因為中秋，所以會加餸，而且晚黑搞活動時仲有小食食添。不過我哋嘅主要嘅目的就梗係唔係爲咗多碟餸啦。聼講今次晚會有大獎啊，咁個個就梗係望住個晚會快Ｄ開啦！！！

　　一返到去嗰邊，未落車就聞到好香啦。原來，已經有幾個“師傅”喺白宮準備咗成個下午啦。

俾大家睇下個會場先，其實都未點開始擺。

燒鷄翅，個個都中意食．．．．．．．．．

當然仲有燒羊髀啦（係成隻羊嚟噶，中午先殺，不過因為成隻唔好燒，好易燒唔熟，所以淨係燒咗幾衹髀。

你睇我哋燒得幾開心吖．．．．．（旁觀者：擺明係擺拍啦，好假啊！　我：沒辦法啦，都已經燒好咗了）

宜家先發現，後面有人偸食緊鷄翅啊！！！（其實，大家有沒發現.......）

呢隻髀大啊，我中意！！

　　等咗好耐，個晚會終於開始啦。一開始就當然係領導致詞啦。由於一大班男人，所以都沒搞咩節目，一於齊齊玩遊戲，攞大獎！我哋總共分成６組，每組６個人參加。贏咗嗰組就有獎品。抽籤之後我分咗喺第四組。

　　首先就係投籃比賽，每個人都要掟三波，按照平時有沒去打波嘅分成兩條線，沒嘅就企喺近嗰條投籃（大概係罰球線近少少），有打開波嘅人就要企喺遠嗰條線投（大概遠罰球線少少啦）。最被睇好嘅係第二組，因為６個人之中，有５個平時打開波，而且都打得唔錯，可以算係主力了。點知，最後個結果簡直令人大跌眼鏡。唔知係光線太差，定係條線太遠。第二組６個人１８球得２球係入嘅。反而平時沒咩點打波嘅第五組竟然以１８投１０中嘅成績奪冠。搞到第二組Ｄ人俾我哋笑“夢之隊”得２波入，笑咗鬼咁耐。

　　第二個比賽竟然係“超級無敵馬拉松”，而且仲係以個人賽名義，贏咗有把瑞士軍刀啊！！我無理由唔去噶。點知，哎，竟然唔俾用粵語，最後就輸咗喺句“遠不如近”度，用煲冬瓜玩Ｄ詞好難記啊。

　　第三個比賽同樣經典，就係“超級無敵大電視”。結果都係因為組員溝通唔夠，所以衰咗了。５５５５５５５

　　到咗最後階段就梗係萬衆矚目嘅“大抽獎”啦。反正以分組個號爲準，抽到邊個就係邊個。安慰獎就係洗頭水之類，三等獎就係洗衣粉一大袋（唔好以為好少嘢啊，呢Ｄ物資喺呢邊好實用，好值錢噶），二等獎就係２Ｇ嘅Ｕ盤一個，一等獎就係一把大嘅瑞士軍刀一把（點解嘅多軍刀噶？批發軍刀噶間公司？），我心諗，把軍刀有咩用，仲不如要個Ｕ盤，不過都唔係我話事啦。　　開始啦開始啦。從三等獎開始，祥哥（高層之一）一路抽個號出嚟，一路讀，越讀大家就越緊張。有Ｄ人，睇得開Ｄ嘅，會講，中咗三等就已經好開心，有Ｄ人一聼到３等獎有份，就話：哎，一、二等沒份了，做咩咁早抽到我噶。我聼住佢係咁讀，都已經讀到二等獎噶啦，點解都沒我份噶？唔通我眞係沒運？突然間，我聼到佢叫，２３號，我個心係咁跳咗跳，可惜啊，我個係２４號啊，差一個咋。哎，今次沒了，沒可能連續兩個數吧。果然，跟住果個唔知係咩數。就喺我諗住無望嘅時候，跟住２３號後面嗰個數竟然沒人抽中。（因為唔確定總人數，所以抽獎號碼係多於總人數）。然後，就喺呢個時候。聼到祥哥大聲咁叫：２４號。哇！！！咁都可以中到啊！！！當時，我咩沒諗就即刻衝咗上去。就咁就挪咗人生中第一個遊園會抽嘅大獎啦。哇哈哈！!

　　之後嘅一等抽獎嘅時候都已經開心到沒聼邊個中了。開始慶倖自己竟然有少少運氣喔。

　　雖然個晚會好短，但係對於我哋呢班遠離故鄉嘅人嚟講已經係好好噶啦。望住外面嘅月光，一邊食住月餅，其實外國嘅月光都唔係比中國嘅圓幾多吖。但係心情嘅話，我諗應該個個都好唔同吧。

最後貼埋我手頭上有嘅相出嚟，因為當晚有好多部機，Ｄ相都未收集到。得幾張，大家就將就睇下啦。

一個奇怪嘅現象，點解一隻羊會有６隻髀呢？    一人兩個，中國空運到嘅東海月餅　　

　　　　　　　　　　　　　　　　　　開　　餐　　啦

我師兄，早我幾年畢業，佢好照顧我噶！

最後送上外國八月十五嘅月光，大家睇下係咪其實都唔係好圓呢！！

馬路殺手　　

　　話說上週某日，在辦公室開完夜總會之後就已經成十一點半。於是，就要送大家番宿舍啦。司機唔夠用，唯有開一部麵包車Ｄ人，然後再開部細車到時接番麵包個司機番嚟啦（因為部麵包車要放喺宿舍果邊）。事件出現啦！！！呢個時候，我見咁夜了，前幾日先學過下手波點開，一於試下上路啦。一路上我就覺得沒咩嘢了，點知坐我車果Ｄ同事就嚇到鬼咁，特別係坐我旁邊果個。我就一路開佢就一路叫我睇人啊，睇車啊咁。鬼咁緊張。哈哈。不過諗番起，又眞係轉一個彎嘅時候差Ｄ撞到一部車嘅。不過總算沒事啦。做咗次馬路殺手添。睇嚟都係要俾心機練下先了。

血戰到底

　　呢邊晚黑沒咩活動噶咋，都係上下網，睇下書，打下牌。其中打牌就梗係有好多種玩法啦。其中一種聼聞係重慶麻雀嚟嘅，大家稱其爲－血戰到底。打法同廣東麻雀差唔多，唔同就係可以無限番同埋必需缺一門，一家胡，輸家繼續，直到摸完，如果摸完時未叫胡嘅一樣要俾叫咗胡嘅牌面錢。

　　就喺我做完馬路殺手第二晚就打咗一次。因為第一次打，好唔習慣。Ｄ人已經１SDG起胡咁就我了。點知到咗最後都係輸咗成５０幾SDG。（注：１SDG＝４RMB）。不過發現，當晚輸得多唔係打牌輸嘅。有一個人買兩隻馬，買馬唔緊要，最慘就係佢哋計馬唔計番，係直程計胡。即係一個人食咩胡，中馬嘅話就直接將個數乘２或３。就算係無番胡乘咗３都可以有3蚊進賬。反正今次輸慘了，小半晚就輸咗　二百幾RMB，如果喺國內計，就成爲打咁耐麻雀以來輸最多嘅一次了。

醫院驚奇

　　尋日有個同事病咗，我帶佢去睇。第一次去呢邊嘅醫院。由於我哋唔識阿語，所以唯有去間華人開嘅醫院啦。因為大家都識中文，所以掛號睇病都好順利。戲肉嚟啦。當我帶佢去檢驗時，要抽血同埋“督”手指。但見個外籍護士（睇唔出係邊度人，反正唔係西人，唔係東人，亦都唔係蘇丹人）幫個同事揾血同埋“督”手指時完全沒任何消毒措施（例如國內見到嘅揾血前用碘酒消毒啊，“督”手指前用小酒精球消毒啊）。佢係咁揸住支針就拮落去隻手度。更恐怖嘅就係佢喺抽完之後拿樣本時竟然就咁用草紙抹下個針頭之後係咁放咗支針頭喺枱面度。乜唔會傳染嘅咩？好恐怖啊！！

　　仲有Ｄ小事就係，個電梯好“流”啊。去到時發現有羣人圍喺個電梯度好耐，我哋睇完醫生出來都未散，後來先知原來有幾個人推人病人上病房時被困半個幾鐘！！！有沒搞錯，如果係急症咪死人都似，天啊！！最後就係，去照X-Ray時，國內全部不銹鋼門關到實。呢邊係木門都由佢啦，仲要係開度大大咁。驚輻射唔死麽？

　　唯一好嘅就係，喺呢度睇病Ｄ中國醫生都幾好人，而且可以兼當地人隊噶。哈哈！不過睇病眞係好貴。睇病、驗血、三日吊針，加埋盛惠５２４蚊，約全二千幾RMB........

等吊針等到好無聊時影下相　　　　　　　　　醫院樓頂，對面係飛機場　　　　　尋日午飯，其中一個俾同事，3SDG

　　上次話要貼相上嚟，都係貼咗先啦。

　　　　　呢度係會客室　　　　　　　　　　　　呢度係辦公地方一　　　　　　　　　　　　呢度係辦公地方二

呢幾張係去皇宮嘅時候影嘅。不過沒機會影到入面。得出面都好過沒啦。哈哈！

　　講起呢個全國最大嘅Shopping Mall，我去過兩次，第一次係去買電話卡，第二次係陪人去買嘢。第一次去到人比較多，還算熱鬧，不過就因為趕時間，買咗電話卡就走了。淨係影咗張停車場同埋間蘇丹ＧＩＯＲＤＡＮＯ。

　　第二次去就好Ｄ，可以慢慢行，不過發現一個比好又多都細嘅地方其實都沒咩好行。一樓租曬出去俾人，二樓有一間電影院，保齡球場同埋兩間cafè，不過Ｄ嘢都好貴，都唔啱我哋呢Ｄ人噶啦！

　　因為種族問題，我都唔敢影人，所以Ｄ相大部份都沒咩人噶。不過我就幾中意Ｄ壁畫，好有本地feel。

最後，加一張人哋請嘅雪糕，同埋喺商場二樓嘅自拍啦。

　　個雪糕要成８RMB噶啦！

－－－－－－－－－－－－－－－－－－－－－－－－－－－－－－－－－－－－－－－－－－－－－－－－－－－－－－－－－－－－

下一集：　中秋節特別篇。不過Ｄ相唔喺我度，所以可能唔會好長。不過Ｄ相我會Post上去我相冊噶啦。

　　三個鍾頭嘅機，從卡塔爾到蘇丹首都喀土穆（Khartoum الخرطوم），一樣咁無聊，試著同旁邊嘅蘇丹老太太講解飛機上嘅設施點用，以用嚟打發時間。唯一嘅特點係空姐難得用中文同我講嘅兩句話：“請你把窗打開”同埋“再見”。在隔中國咁遠嘅地方聽到外國人講中文，突然感到好親切。同時也覺得，佢會唔會係華裔呢。

　　喺飛機上一直都淨係見到白雲朵朵，唯一嘅變化就係飛過咗海之後（應該係紅海吧，我地理好差），D雲嘅顔色從白色變成紅紅地同黃黃地嘅色，可能呢D就係沙漠嘅顔色吧。因爲玻璃太蒙，喺飛機度都沒點影想，所以淨系喺降落時用手機記錄下呢個黃色嘅國度（CB在我初初話要嚟Khartoum嘅時候，曾經用Google Eearth　cut咗張衛星圖我睇－－基本成個地市都係黃色）。

　　初落機時，不知方向，仲死咁喺度等簽證，而且就咁沒咗110USD。蘇丹人民俾我嘅第一印象－－悠閑，或者可以講係懶。辦個簽證，傾偈都傾咗一半時間去，呢D咩辦事效率嚟噶。

　　出到機場，還好，唔係好熱，感覺同高三畢業時去三亞旅遊時差唔多。得到果陣喺廣州見過嘅同事嘅接待，歸屬感總算有翻。不過同事同我講，我算好彩，前幾日落過雨，所以唔係好熱。當我哋部車行過一個機場轉角嘅牌度，發現上面有一個溫度計，上面赫然寫住－－39攝氏度。

　　車直接番宿舍，因爲到食飯時候了，我哋個飯堂喺宿舍嗰邊。而聽佢哋講，辦公室同埋喺外面嘅人，都係要我哋用車送飯嘅。個人感覺，好蔴煩。安頓好之後，第一樣嘢就係派同事叫我帶過來嘅嘢。我諗我兩個箱咁重，起碼有一半嘅嘢唔係我嘅。再之後，因爲宿舍俾我張床仲未可以整蚊帳，所以我番咗番辦公室嘅房間借住。因爲太攰，沒點行過就去咗瞓了。

　　其實嚟到咁耐最好玩就係同D同事吃完飯打下波，同埋睇D人玩幫我哋看屋同打掃嘅小黑。（呢邊一般都會揾當地人幫下手睇屋同埋執下家頭細務）。佢哋最中意就係笑個黑人，成日同佢講話要同佢耍Chinese Kongfu，佢又好傻咁話佢識喔。記得有一日佢仲走過嚟問我識唔識，話要同我過兩招喔。哎，佢咁瘦弱，唔識功夫都打沈佢啦。可惜嘅就係到而家都未有機會向D黑人請教下點講阿拉伯文。哈！！

最後，介紹下我工作地方嘅週圍環境啦。因爲週圍都差唔多，都唔知影咩好，而且同事同我講影相時唔好亂影，所以就求其就算了。

第一張系我第一日落機後番宿舍飯堂食飯時即時影嘅，四大煲。哇哈哈！

一煲係湯，兩煲飯，一煲饅頭。

跟住呢幾張係宿舍個園仔同埋我住間房，個園仔度有個籃球場噶，雖然個框因爲係D人自己焊嘅，所以唔多標准。哈哈！

我就住喺個窗下面果張床，不過張相影果陣我仲未整蚊帳。成間房有7個人住。最最唔中意嘅就係唔知點解D人好中意過嚟呢間房打麻雀，仲要日日都打到鬼死咁夜。搞到我沒覺好瞓。

　　哦，仲有，介紹下呢邊嘅構成先。我哋呢邊總共有三間屋，一間係辦公室，同時係老總和元老級嘅人住嘅地方，環境唔錯。大家起咗個名叫做中南海，因爲點都係公司總部吖嘛，英文名就叫OFFICE（英文名用嚟同D黑人司機指路嘅時候用）。第二間就係我哋宿舍了，係呢邊住宿嘅總部，有兩層，同埋上面大家睇到嘅大院，總共住咗成三十人。呢邊個名叫做白宮，因爲呢邊嘅牆比起其他兩間都白掛，而英文名叫當然叫做White House啦，但係唔知點解D人同司機講嘅時候係叫阿拉伯名MAMURA喔（仲未搞清楚阿拉伯文點拼，以後識先補番啊）。最後一間就係皇宮啦，大家唔好以爲個名咁好聽實係好嘢喔。啱啱相反，呢個地方係三個地方最差嘅。外牆睇落去都係磚土結構，第二層仲要爛咗尾未起好添。成間嘢由內到外都係黃黚黚。咁點解叫皇宮？大家睇下個英文名就知啦。沒錯你哋估啱咗啦，米就係Yellow Hourse皇（黃）宮之嘛。

－－－－－－－－－－－－－－－－－－－－－－－－－－－－－－－－－－－－－－－－－－－－－－－－－－－－－－

下一集，等我Post D辦公室同皇宮D相上嚟啦。仲有仲有，就係有號稱全國最大嘅Shopping Mall睇添啊。

　　上次講到，好趕咁喺香港機場行咗轉之後就要上機了。因爲有咗海南同日本兩次坐飛機嘅經驗，所以都已經熟曬手，加上我又唔會好似波咁怕死，連坐飛機都驚，基本上係沒咩問題嘅。就係咁，我踏上咗我嘅旅程啦！

　　由於從中國沒直達蘇丹嘅機，所以要去多哈轉。今次坐飛機係卡塔爾航空嘅，因爲飛往多哈，所以好多人都已經係中中哋東，同埋有幾個黑人了。呢個另我非常開心，點解？咁樣就算拉登劫機都唔會搞佢D同胞吖嘛！令我意外嘅就係原來中國人都唔少，唔通佢哋得閑無事做走去中東旅遊？又定係好似我咁要走去非洲行番轉啊？如果係就好啊，有人陪。

　　經過成9個鍾嘅機之後（頂，乜原來香港飛中東都要咁耐噶？我成日以爲4,5個鍾就可以搞掂添），終於到咗多哈機場啦。不過好失望，一出門就見到D人就已經發現有50%係黑色噶啦。哎，以爲中東嘅人會唔同D添。落咗機梗係即刻睇下系邊度等下一班機啦，點知一問個黑鬼大叔，佢就死咁用D非洲英文同我講，我部飛機第朝先飛，叫我過去Transfer個櫃台度登記，去到唔知條友講咗堆咩文之後就俾咗兩張嘢我，我一睇，一張寫住supper，另一張就寫住breakfast，心諗，又幾好喔，十一點幾仲有supper食。等我行番出來去餐廳度食免費supper時，我睇一睇個鍾數咗下，當堂成個傻咗。怪唔得咁好服務啦，原來要我一個人喺機場度等成13個鍾！！！（我係晚上7點半從香港出發，到卡塔爾系當地時間嘅晚上11點三左右，要轉果班機係第二日中午12點十一）天啊！！！！咩系統嚟噶？竟然要等咁耐，就算有嘢食都會死人噶。

　　不過怨都沒用，都係去睇下有咩食先啦。去到餐廳，原來每個人都係得一set嘢，一個飯（睇顔色似係咖哩，乜中東人都中意呢味嘅嘢咩），一個牛油包，都埋一杯汽水。等我揾番個位之後坐落，諗住好好歎下。點知，D飯一食落去，哇，玩毒殺啊？D咖哩樣貌嘅嘢超難食，裏面嗰D唔知咩肉真係，仲難食過我哋煲湯煲到老曬嘅肉。哎，十三個鍾嘅無聊時間都未打擊完，又搞D咁嘅嘢啊！從此我得出咗，飛機餐難食，機場D免費餐更難食，嘅結論。

　　好艱難咁食完D嘢（難食都要食噶，成晚流流長，個機場又凍喔，唔食嘅話就真係又餓又凍啦），喺機場行咗一圈，發現多哈嘅機場真係好細（至少呢個係），幾分鍾就行完，而且度度都咁嘈，點瞓覺啊？頭先見到D中國人又轉曬機去法國同英國喔（咁又係，有幾多個人好似我咁去非洲咁奇怪吖）。當我逛緊睇下邊度可以靜D可以俾我瞓覺嘅時候，有一位印度樣貌（後來問好似係北巴基斯坦之類，因爲個地名未聽過，不過佢轉機去DHAKA）嘅人走過（好似係同我同一部機啩），唔知點解我哋就傾咗起身。佢在南非做生意，然後今次番去探老婆仔女喔。都好在有佢陪我傾偈，總算捱咗幾個鍾。如果唔係都唔知點捱了。

　　就係佢啦！　　　　　　　　　　個Quiet Room門口，外面睇入去真係好黑噶　　　　　 Quiet Room入面

　　傾完之後，我揾多半日先揾到機場有個Quiet Room俾人瞓覺嘅。（其實唔係揾唔到，係見到裏面沒燈黑嘛嘛，D人又黑嘛嘛，一直唔敢入去，到最後眼瞓到頂唔順先走入去咋）

　　在房裏面瞓到第朝，再週圍行咗好多個圈，都仲有成三個鍾，唯有到處影下啰。

　　　　　　　　　　　　　　　　　　　　就係呢間嘢啦，鬼咁難食D嘢

　　　　　　　　　候機室　　　　　　　　　　　　　　機場外面，好荒蕪啊

今次帶嘅行李，呢度成20斤嘢噶啦　　　　　　　呢個標志好得意　　　　　　　　　　　　　　　　接駁巴士

機場裏面（阿拉伯文好難明）

　　今次出嚟已經知道起碼要下年過年先要得番，所以心情都算平靜啦。食又食過（臨走一個星期基本上晚晚都係出面食到好飽），玩又玩到傻曬，心願又了咗，屋企人又陪過了，仲白拿咗一個月糧添，仲想點啊？反正唔使一年就可以回國了，咪同果陣番學校上課差唔多。始終會番嚟嘅，到時候又系一條好漢！哇哈哈（已經傻咗）。不過當然啦，點都要多謝屋企人嘅支持，朋友嘅鼓勵（特別係肥仔介紹呢份工俾我），仲有自己嘅決心啦。

　　最後，整兩部機場影嘅車同埋果兩餐還算可以嘅飛機餐大家睇睇啦。一部BMW，一部BENZ。果兩餐，好似一餐羊一餐雞。唔記得了。

差D唔記得，仲有個黑匣子。細個咗D，將就下。（黑色嗰個啊，唔系大嗰個啊）

仲係果條一D都唔華麗嘅分隔線。

－－－－－－－－－－－－－－－－－－－－－－－－－－－－－－－－－－－－－－－－－－－－－－－－－－－－－－－－－－－－

下一集！

終於到咗啦。乜嘢都好新奇，好新鮮啊。究竟有咩咁好玩呢？

　　話咁快又到咗出發嘅日子啦！好彩我前幾日玩得夠盡嗟。首先就係星期五放工之後同肥仔去咗食飯睇電影(梗係唔係得兩條友啦,仲有我可愛嘅Fiona妹妹吖嘛...哦哦...係.....仲有海靜...唔好打我啊)..一晚沒番屋企之後..又到咗第二日晚上嘅初中同學食飯...加埋呢個買三送二嘅K.....然後又係一晚通宵....然後星期日朝早再加多場波添.(雖然唔係咁好玩)..不過....真係盡興啊！！！攰咗我幾日,仲要搞到我星期日晚執嘢執到十二點幾添!!!所以呢,我.....都係從到咗香港寫起啦...

　　話說當日，番公司執完嘢，非常驚喜咁發現已經有糧簿攞，咁去完打簿、買嘢，番到公司係咁食D嘢就已經要出發啦。仲搞到我要飛的添。好彩都係趕到部去香港嘅BUS，如果唔係就飛機都誤埋了。

　　經過4個鍾頭嘅BUS顛簸之後......終於直接來到香港新機場了....不過因爲太多行李..所以雖然第一次到..但係都係喺其中一角就算了..

呢張係一入機場見到嘅飛機模型....我同一部車嘅團友超中意喔...

睇完模型就梗係要托運啦......我坐果班係卡塔爾航空啊(QATAR AIRWAYS)

不過唔稱唔知...我個箱重成50斤..我個背囊竟然都有成20斤...喔...竟然超曬重都沒罰我錢...托運姐姐真係好人啊!

最後貼兩張香港機場嘅唔知乜嘢相相上來當收場啦!!!

--------------------------------------------------------------------------------------------------------------

下一集....終於上飛機啦..唔知前路會點呢!!加油加油!!!

　　幾經波折，終於開咗工一個幾月啦。其實番咗一個月工都唔知做咗D乜噶，日日番到辦公室就係開咗部腦睇下新聞傾下Q。再唔係就係用手機聽下音樂源動力。最辛苦嘅時候都係幸姐叫我翻果份公司章程同埋大綱。簡直攞命啊！！！！平時翻譯D中文就已經唔係好好，加上俾D電信詞彙同埋合同專用嘅therein, thereon ,thereafter搞到我頭都大埋。仲要鬼死咁多頁添。哎！！！

　　不過點都好，有得做都好過沒啦。最開..........開心嘅就係喺出發果日上去財務度拿到我本工資簿啦！！！哇哈哈！！！打埋簿發現原來先知已經出咗糧好多日噶啦，早知早D攞，唔使等我鬼咁窮啦！！！呢份出發禮物真係唔錯啊！

　　一句話，第一次出糧，好開心啊！！！！

PS：　下一集開始 ，連載蘇丹漫游記，簡直係勁啊！！！

　　等咗成十日，終於都係拿到畢業證同學位證了。

　　搞咗咁耐都係因爲限選學分唔夠。大四上學期開始，學院發現限選分唔夠，就開始要我哋選專業選修，我哋方向1.5分，文學5.5，語言學好似系４定５吧。但係，選嘅時候發現，Ｄ專業選修課全部同專業課有衝突。咁本住認真上課原則（^_^）就梗係唔報住啦。點知到咗下學期，臨畢業佢先話要等個選修成績出咗來先有證書拿。真係激死人啦。大家都係咁上課之嘛。Ｄ選修好心就在我哋畢業前就結課攷試啦。搞到我哋等多十日。

　　不過點都好，都係呻下嗟。而家拿得到仲唔開心到死咩。等我喺度Show off一下先。哈哈！

　　至於畢業禮之類嘅相，因爲大部分都喺屋企部相機度，就番到去有時間再整啦！！！

　　拖咗三日終於將論文改好咗發咗俾老師。雖然明知自己改得唔好，但系總算係叫做完成埋一項工作。

　　呢半個學期睇嚟係我大學四年裏面最忙嘅一個學期了。三月初專登返來學校攷八級，攷完之後又趕咗返廣州實習。五月初連五一節都未過完就匆匆趕咗返嚟寫論文。

　　最慘就係篇論文由於個研究做得唔係咁好，所以寫落手時發現理論Ｎ多但係沒幾個用得到，加埋個設計唔合理，引用嘅時候仲要擔心Ｄ數據邊Ｄ用得邊Ｄ唔用得。總知就係煩啦。咁啱今年係佢哋最後一屆嘅高攷，我嘅答辯日又係喺十號喔。佢哋高攷我就通宵咁滯喺度趕論文，真係仲慘過高三。不過呢Ｄ日子總算過去了。

　　呢個學期忙係忙，不過就好開心。首先就梗係八級俾我低空過咗。本來已經打定曬輸數了，點知竟然臨尾拿返個安慰獎，當然開心啦。第二樣嘢就係終於實習啦。實習裏面唔單只學到好多嘢，而且至少我知道其實少少嘢我都係可以做到嘅。第三樣嘢就係同波同ＣＢ夾份研究中國股票，雖然自己一Ｄ都唔識啊，但係睇住波只甘化坐完艇跟手熬埋底又真係覺得好好玩。（波，唔係我踩你啊，你只甘化始終都會上返來嘅。哈哈）

　　最後就梗係要概歎下大學生活咁快就過完啦！雖然沒咩值得記念，但係畢竟都叫做經歷過四年。始終有Ｄ唔舍得嘅。宜家希望嘅就係可以順利畢業啦。

ＰＳ：喺度順便祝下高攷嘅星，狐狸，Treen，高三兄等人可以錄到好學校啦。

最後放一張答辯時影嘅相相啦！

終于實習了。發現實習前放的實習假的確無聊非常，睇書又唔係，係屋企又沒嘢做喔。

實習時發現係公司可以學到好多嘢噶。不過公司嘅電腦實在好可惡啊。竟然沒俾Admin權限我，N多有用嘅軟件都用唔到。

 
呢幾日交易會，不過我沒得去哦，每日就在辦公室幫師傅看電話同整文件，辦公室都去咗唔少人，靜了好多哦。本來呢，谂住師傅去咗交易會，我在公司比較得閑，可以更新下個Space，然後傳DD相相上去噶嘛。點知部可惡的電腦竟然連相都傳唔到啊。163又唔得，Space又唔得。哎！

發現返到嚟廣州就係多野食。攷完八級之後一個幾月之嘛，就已經組織食過N次飯了（仲要有三次係入我爸度的，汗啊，點解好似賣曬廣告咁噶）。不過發現，原來做嘢之後好中意約人出來喔，可能係因爲剛入公司同D人唔熟啦。都係同D同學好玩D。哈哈。

今日都28號了。做到30號我嘅實習就結束了。唔知返到屋企之後會唔會繼續好悶呢？

不過谂起可以返學校懶多兩個月。都算唔錯喔。哈哈。

返到學校谂下辦法傳D相相上來先。