Nothing but Anything;

　　懶咗Ｎ日，今日一於更新下啦。不過都係寫番以前嘅嘢－－中秋啊。

　　講起中秋，自從出咗外省讀書之後，就除咗上年帶咗昊澤兄返廣州過（詳見前面嗰篇廣州札記［轉］），就好似沒點喺屋企過了。今年出咗嚟做嘢，又係沒得喺屋企過。無辦法啦，都係做嘢緊要吖嘛，而且仲可以睇下外國嘅月亮究竟係唔係特別圓嘅添。

　　喺蘇丹，我哋公司大概有成７０個人，減咗喺Khartoum出面做嘢嘅人之後，大概都有成４０個人係喺公司過中秋嘅。雖然大家都係身在異鄉，不過難得有咁多人，總算都叫做可以熱熱鬧閙咁過了。

　　因爲中秋都要返工，所以從返工開始就盼放工。幾辛苦等到有得提早放工，就即刻快快趣返到白宮嗰邊幫手準備晚飯Ｄ嘢同埋晚會Ｄ嘢。因為中秋，所以會加餸，而且晚黑搞活動時仲有小食食添。不過我哋嘅主要嘅目的就梗係唔係爲咗多碟餸啦。聼講今次晚會有大獎啊，咁個個就梗係望住個晚會快Ｄ開啦！！！

　　一返到去嗰邊，未落車就聞到好香啦。原來，已經有幾個“師傅”喺白宮準備咗成個下午啦。

俾大家睇下個會場先，其實都未點開始擺。

燒鷄翅，個個都中意食．．．．．．．．．

當然仲有燒羊髀啦（係成隻羊嚟噶，中午先殺，不過因為成隻唔好燒，好易燒唔熟，所以淨係燒咗幾衹髀。

你睇我哋燒得幾開心吖．．．．．（旁觀者：擺明係擺拍啦，好假啊！　我：沒辦法啦，都已經燒好咗了）

宜家先發現，後面有人偸食緊鷄翅啊！！！（其實，大家有沒發現.......）

呢隻髀大啊，我中意！！

　　等咗好耐，個晚會終於開始啦。一開始就當然係領導致詞啦。由於一大班男人，所以都沒搞咩節目，一於齊齊玩遊戲，攞大獎！我哋總共分成６組，每組６個人參加。贏咗嗰組就有獎品。抽籤之後我分咗喺第四組。

　　首先就係投籃比賽，每個人都要掟三波，按照平時有沒去打波嘅分成兩條線，沒嘅就企喺近嗰條投籃（大概係罰球線近少少），有打開波嘅人就要企喺遠嗰條線投（大概遠罰球線少少啦）。最被睇好嘅係第二組，因為６個人之中，有５個平時打開波，而且都打得唔錯，可以算係主力了。點知，最後個結果簡直令人大跌眼鏡。唔知係光線太差，定係條線太遠。第二組６個人１８球得２球係入嘅。反而平時沒咩點打波嘅第五組竟然以１８投１０中嘅成績奪冠。搞到第二組Ｄ人俾我哋笑“夢之隊”得２波入，笑咗鬼咁耐。

　　第二個比賽竟然係“超級無敵馬拉松”，而且仲係以個人賽名義，贏咗有把瑞士軍刀啊！！我無理由唔去噶。點知，哎，竟然唔俾用粵語，最後就輸咗喺句“遠不如近”度，用煲冬瓜玩Ｄ詞好難記啊。

　　第三個比賽同樣經典，就係“超級無敵大電視”。結果都係因為組員溝通唔夠，所以衰咗了。５５５５５５５

　　到咗最後階段就梗係萬衆矚目嘅“大抽獎”啦。反正以分組個號爲準，抽到邊個就係邊個。安慰獎就係洗頭水之類，三等獎就係洗衣粉一大袋（唔好以為好少嘢啊，呢Ｄ物資喺呢邊好實用，好值錢噶），二等獎就係２Ｇ嘅Ｕ盤一個，一等獎就係一把大嘅瑞士軍刀一把（點解嘅多軍刀噶？批發軍刀噶間公司？），我心諗，把軍刀有咩用，仲不如要個Ｕ盤，不過都唔係我話事啦。　　開始啦開始啦。從三等獎開始，祥哥（高層之一）一路抽個號出嚟，一路讀，越讀大家就越緊張。有Ｄ人，睇得開Ｄ嘅，會講，中咗三等就已經好開心，有Ｄ人一聼到３等獎有份，就話：哎，一、二等沒份了，做咩咁早抽到我噶。我聼住佢係咁讀，都已經讀到二等獎噶啦，點解都沒我份噶？唔通我眞係沒運？突然間，我聼到佢叫，２３號，我個心係咁跳咗跳，可惜啊，我個係２４號啊，差一個咋。哎，今次沒了，沒可能連續兩個數吧。果然，跟住果個唔知係咩數。就喺我諗住無望嘅時候，跟住２３號後面嗰個數竟然沒人抽中。（因為唔確定總人數，所以抽獎號碼係多於總人數）。然後，就喺呢個時候。聼到祥哥大聲咁叫：２４號。哇！！！咁都可以中到啊！！！當時，我咩沒諗就即刻衝咗上去。就咁就挪咗人生中第一個遊園會抽嘅大獎啦。哇哈哈！!

　　之後嘅一等抽獎嘅時候都已經開心到沒聼邊個中了。開始慶倖自己竟然有少少運氣喔。

　　雖然個晚會好短，但係對於我哋呢班遠離故鄉嘅人嚟講已經係好好噶啦。望住外面嘅月光，一邊食住月餅，其實外國嘅月光都唔係比中國嘅圓幾多吖。但係心情嘅話，我諗應該個個都好唔同吧。

最後貼埋我手頭上有嘅相出嚟，因為當晚有好多部機，Ｄ相都未收集到。得幾張，大家就將就睇下啦。

一個奇怪嘅現象，點解一隻羊會有６隻髀呢？    一人兩個，中國空運到嘅東海月餅　　

　　　　　　　　　　　　　　　　　　開　　餐　　啦

我師兄，早我幾年畢業，佢好照顧我噶！

最後送上外國八月十五嘅月光，大家睇下係咪其實都唔係好圓呢！！

馬路殺手　　

　　話說上週某日，在辦公室開完夜總會之後就已經成十一點半。於是，就要送大家番宿舍啦。司機唔夠用，唯有開一部麵包車Ｄ人，然後再開部細車到時接番麵包個司機番嚟啦（因為部麵包車要放喺宿舍果邊）。事件出現啦！！！呢個時候，我見咁夜了，前幾日先學過下手波點開，一於試下上路啦。一路上我就覺得沒咩嘢了，點知坐我車果Ｄ同事就嚇到鬼咁，特別係坐我旁邊果個。我就一路開佢就一路叫我睇人啊，睇車啊咁。鬼咁緊張。哈哈。不過諗番起，又眞係轉一個彎嘅時候差Ｄ撞到一部車嘅。不過總算沒事啦。做咗次馬路殺手添。睇嚟都係要俾心機練下先了。

血戰到底

　　呢邊晚黑沒咩活動噶咋，都係上下網，睇下書，打下牌。其中打牌就梗係有好多種玩法啦。其中一種聼聞係重慶麻雀嚟嘅，大家稱其爲－血戰到底。打法同廣東麻雀差唔多，唔同就係可以無限番同埋必需缺一門，一家胡，輸家繼續，直到摸完，如果摸完時未叫胡嘅一樣要俾叫咗胡嘅牌面錢。

　　就喺我做完馬路殺手第二晚就打咗一次。因為第一次打，好唔習慣。Ｄ人已經１SDG起胡咁就我了。點知到咗最後都係輸咗成５０幾SDG。（注：１SDG＝４RMB）。不過發現，當晚輸得多唔係打牌輸嘅。有一個人買兩隻馬，買馬唔緊要，最慘就係佢哋計馬唔計番，係直程計胡。即係一個人食咩胡，中馬嘅話就直接將個數乘２或３。就算係無番胡乘咗３都可以有3蚊進賬。反正今次輸慘了，小半晚就輸咗　二百幾RMB，如果喺國內計，就成爲打咁耐麻雀以來輸最多嘅一次了。

醫院驚奇

　　尋日有個同事病咗，我帶佢去睇。第一次去呢邊嘅醫院。由於我哋唔識阿語，所以唯有去間華人開嘅醫院啦。因為大家都識中文，所以掛號睇病都好順利。戲肉嚟啦。當我帶佢去檢驗時，要抽血同埋“督”手指。但見個外籍護士（睇唔出係邊度人，反正唔係西人，唔係東人，亦都唔係蘇丹人）幫個同事揾血同埋“督”手指時完全沒任何消毒措施（例如國內見到嘅揾血前用碘酒消毒啊，“督”手指前用小酒精球消毒啊）。佢係咁揸住支針就拮落去隻手度。更恐怖嘅就係佢喺抽完之後拿樣本時竟然就咁用草紙抹下個針頭之後係咁放咗支針頭喺枱面度。乜唔會傳染嘅咩？好恐怖啊！！

　　仲有Ｄ小事就係，個電梯好“流”啊。去到時發現有羣人圍喺個電梯度好耐，我哋睇完醫生出來都未散，後來先知原來有幾個人推人病人上病房時被困半個幾鐘！！！有沒搞錯，如果係急症咪死人都似，天啊！！最後就係，去照X-Ray時，國內全部不銹鋼門關到實。呢邊係木門都由佢啦，仲要係開度大大咁。驚輻射唔死麽？

　　唯一好嘅就係，喺呢度睇病Ｄ中國醫生都幾好人，而且可以兼當地人隊噶。哈哈！不過睇病眞係好貴。睇病、驗血、三日吊針，加埋盛惠５２４蚊，約全二千幾RMB........

等吊針等到好無聊時影下相　　　　　　　　　醫院樓頂，對面係飛機場　　　　　尋日午飯，其中一個俾同事，3SDG

借琪篇文章一用.

引用

超低能勁搞笑-兒時版
最近幾興懷緬一下兩三歲到五六歲幼兒時光。

我對過去的記憶係異常的出色，我的記憶可以去到兩歲多時在一家幼兒園待的光景。那陣的我不是很喜歡那個幼兒園，印象中那裏邊的燈光係暗暗的，整天也沒有玩什麽，最記得係一直會拿著橡皮泥渾渾噩噩地過。當然，那時只有兩歲多，理應如此。

後來三歲左右就到另一算不小的幼兒園，自此我係一個喜歡返幼兒園的人，甚少缺席。我在那幼兒園係快樂的。飯食也過得去，就係0吾中意食那裏的甜品，每次都只係碰一口就有作噁的感覺，特別係食花生糊同蒸蛋糕（注意，係蒸，0吾係焗啊，真係好噁心，現在想起也覺得噁心！）。

在那裏，出現了第一個我會對他含羞答答的人（起雞皮，我居然0甘都講得出口），到現在還記得我那一日穿水手裝衣衫，他坐我隔離爽快地指著我的領帶話點解女仔會帶領帶（哇，真係幾醒目，已經覺得領帶可以係區分男女的一個標準）。我懵懵地又0吾敢望他，支吾以對，不知所雲。他可能見我懵，之後也沒有再跟我説話了，而我就有時會呆呆地望下他就會很開心了。很快他離開了那幼兒園，而我又一直係老師們的寵兒，細個都算幾可愛，媽咪又捨得買靚衫裙我著，又中意跳舞畫畫唱歌做手工而又幾聽老師話，老師當然喜歡囖，玩得多姿多彩到可以彌補再也看不到他的失落。

不用上學的日子自然留在家中，多數係同媽咪一起，我年幼時媽咪當然很年輕，對我很愛 0錫，但我頑皮起來都惹得她忍不住發火。最記得我係一個坐0吾定的人，坐也挑沙發背來坐。有次就係因爲這樣把一部靠牆放著的電子琴被我翻了下來砸落媽咪度，那次她在我大腿上第一次也是唯一一次留下她的指印，那次我哭得很淒厲，而且居然識得強調自己係無心之失，後黎媽咪也安撫我，弄了一份甜點給我夜宵，很溫柔地告訴我她也有錯，0吾應該打我。那份甜點我也記得很清楚，係一隻開半撒上些糖而弄得香熱的皮蛋。之後我食皮蛋都係這樣子食法。

關於食的方面，我還未上小學的時期就很喜歡早餐食燕塘菠蘿酸奶（全名都仲記得）搭菠蘿包。中意食腸粉，湯粉類就中意牛腩米粉。當然細細個就已經中意茶樓的蝦蛟等點心。還有，很喜歡食燉牛犍，零食方面喜歡食朱古力，牛耳朵（用麵粉整的那些，不是真的耳朵），咸酸，卜卜星（0吾知我講咩我都幫0吾到你啦），甜麥圈，震騰騰的羅拔臣jelly同水泡餅。至於家母的家常菜中，我那時最喜歡食她的水煮茄子及蒸魚。還有，我食過最好味的瘦肉粥，那次係我發燒，她特地煮給我，那次食到我差點連舌頭都要吞。她其實當時初為人母，作人妻，0吾多識煮食的。不過勝在誠意十足。

細個異常喜歡沖凍水涼，沐浴液係一隻肉色的大笨像包裝，媽咪也給我用花露水爽身粉。記得有次沖完涼，媽咪把她織得美美的一小頂草帽送給我，我喜歡得不得了。後來也一直喜歡草帽。其實我是有戀物僻的，不過係大大地收斂罷了。

兒時玩意有很多，那時物資已經慢慢豐富了。裙子也算我的玩意。最記得父母周末喜歡帶著我一起逛大酒店里的店鋪。見到喜歡的衣服，很多時我都會告訴他們我淨係睇下，0吾係想買，但一睇就會停留很久，他們當然最後會忍不住會買給我（細細個我都幾古惑）。我那時淨係肯著裙，冬天也一樣。最記得媽咪很喜歡買整套的絨裙給我，有紫色暗花配白蕾絲的，有暗紅格子斗蓬裝的，有芒果黃的等等。至於夏天的裙子，那時姨媽很喜歡自己裁縫衣裳給我，她翻著翻譯介紹日本款色的書，專挑些簡單的款色就做給我。

我幼時其實已經很喜歡睇電視，不過媽咪0吾準我夜訓，每晚早早就訓，最記得我到做《娛樂新聞眼》就要去訓覺了。除了睇電視，我中意騎單車，那時還未識騎兩輪，但每次到公園一定會騎單車。再後來上了小學就一定要玩迷你仿四驅車。當然有玩barbie,係見到表姐玩之後就開始玩，後來不斷買了很多，甚至後來父母疼我疼得買了整套hi-fi、衣櫃及可以著燈的床同化妝檯給barbie，中意收在衣櫃收得很密實，對之非常愛護。不過最喜歡玩的卻不是barbie,係音樂盒，到現在還對音樂盒有無盡的熱衷。

除了這些，我會中意自己扮豬肉佬坐在門口自己賣豬肉又扮買豬肉。在外公家會喜歡玩馬賽克（將它們撘來搭去而已，0吾係真係玩mosaic art啊）同表哥玩拍公仔紙。睇了劉嘉玲同阿燦演的《檸檬丈夫》，會中意學當時女主角扭下扭下0甘行（0吾準笑得太大聲）。毛公仔玩得0吾多，訓覺0吾需要有任何東西陪伴的。我也喜歡玩遙控車以及假槍。尤其喜歡射擊，當然沒有玩真的，但公園那些雷射槍我玩得很多，可能就係這樣，高中軍訓所謂的射擊比賽，居然有次全級女生第三定第四，都幾好笑囖。至於playdough啊，MB智樂遊戲層層疊UNO等之類， 到小學甚至初中先玩。同朋友仔當然會玩hide and seek啦，記憶中同表哥表姐一起睇第一部電影係《倩女幽魂》，那時還未上小學呢，睇到後邊的情節嚇得我以後有一段很長的時間怕黑。

除了在幼兒園聽埋0吾少的故事及傳説以及兒歌如《小太陽》、《香蕉船》、《小時候》、、《何家小鷄何家猜》等（現在想起來都已經覺得呢間幼兒園實在很好，居然成日唱粵語兒歌），基本上在家係沒有兒歌聽的，媽咪卻會唱一兩首給我聽。《落雨大水浸街》、《月光光》那些，還有些數百欖式的童韻。基本上我父母將盧冠廷許冠傑羅文徐小鳳甄妮陳慧嫻劉美娟陳百強李克勤那些歌作兒歌給我聽的。那時好細個每逢聽到陳慧嫻的《傻女》就很不喜歡，大人問點解，我就話聽了個心好0吾舒服。大人笑笑走開，繼續播著他們喜歡的音樂。諷刺的是，現在那首《傻女》係我最喜歡聽的一首曲之一。

回憶起這些瑣事，覺得我細個真似一個小公主，至少百分百係父母的小公主。現在長大了，認清了事實，沒有可能係公主就0吾會有做公主的情意結。不得不講句，我都算幸運，童年過得那麽美好。
-------------------------------------------------------------------------------------------------------

　　前排得閑之時，去番琪個ＳＰ度行下，果然又多咗好多正嘢。其實一路都覺得琪寫嘅嘢好唔錯，就係有時睇完之後不知不覺要走去思考，通常搞到睇完一篇諗完之後就已經幾攰下，所以都睇得幾慢。不過思考總算係好事。其中呢篇我好鐘意噶。

　　鐘意呢篇，一嚟係因為從中我睇到原來琪以前係咁噶。我哋識咗先短短年幾兩年，沒傾過幾多嘢，喺學校時學校嘅嘢都未傾得曬啦，仲邊會傾童年。二嚟，睇完之後令我回憶番好多細個時嘅事同物。不過有一樣嘅估唔到就係琪細個時竟然鐘意著裙，記憶中識佢咁耐都未見過。呵。

 　　文章中提到好多兒時嘅事物（我哋同年噶嘛，肯定有好多嘢都經歷過啦）。記憶中，我都試過唔鐘意去幼稚園，唔鐘意食D馬拉糕類食品，同樣做錯嘢會被打，早餐會食燕塘菠蘿酸奶（其實好似仲有草莓味）另加蘇皮包，不過更多係飲個每日好早好早喺舊屋門口擺賣嘅瓶裝鮮奶吧（嗰陣冇冰箱，所以D瓶裝奶都要即時賣噶），同埋去婆婆屋企就可以食到嘅好好味嘅腸粉（我仲記得果間店叫永安，就喺十八甫）。果陣肉腸都要賣兩蚊碟噶，好貴下，但係每次我放假番去探婆婆，佢都會拿Ｄ錢出來，俾我打包番去一家人食。果陣咁細個竟然識去打包腸粉，都算犀利啦。爲咗好食嘅嘢，沒辦法啦。哈哈。

　　細個嗰陣就沒咩玩具噶啦，最開心就係姨媽喺香港番嚟時帶俾我哋嘅小玩具囉。搞到我成日同表姐爭嘅。豬肉佬就冇扮啦，不過司機同兵仔就會成日扮，不過呢Ｄ都係喺婆婆屋企先會，因為有表姐陪我玩囉，一個人喺屋企好悶噶，爸媽日日都要番工。諗番起，其實好鐘意婆婆間舊屋，好多囬憶都係喺果度，反而自己屋企就沒咩印象了。

　　婆婆間屋應該算係大屋了，雖然四樓，但係用木板間開咗之後每層都仲有成２米（我估咋，反正我細個時覺得好大，而且Ｄ大人都夠高企吖，呵呵）。最重要就係，喺二樓個天窗出去之後有一個小天臺，我婆婆就喺果度種咗好多好靚嘅花花噶。我仲記得嘅就有爬牆虎啦，喇叭花啦（亦都有可能係五爪金龍），好似仲有杜鵑吧，仲有仲有葱添。嘻嘻。每晚我哋就會將Ｄ床搬出去瞓，又涼爽，又可以望見星星喔。仲有估仔聼添。而每逢節假日有親戚過嚟食飯，仲可以有汽水飲添。（沒錯，就係５毫１支押樽５毫嘅亞洲汽水啦）。而且仲有香港連續劇嘅錄像帶睇。果陣過得眞係好開心噶。

　　仲有好多嘅兒歌啊，小食啊，都仲記得噶。我屋企仲有幾餅好耐之前嘅錄音帶噶。除咗琪講嗰幾首《小太陽》、《香蕉船》、《小時候》、《氹氹轉》、《何家小鷄何家猜》，仲有《排排坐》啊，《香蕉船》啊，之類，好多噶。而零食呢，我記得嘅就得一蚊包嘅“奇多”（而家仲有得賣噶），“多拿蝦餅”（個名係咁，由於嗰陣太細個沒記到字，唔知係咪咁寫）同埋“康康蔬菜餅。仲有５分錢嘅“健力棒棒冰”同沒咩味嘅“米通”。５毫一串，３毫一包仔嘅“齋燒鵝”，５毫一包嘅“咪咪”。仲有好多好多。

　　時間眞係過得快啊。好多嘢都變咗，唔變嘅可能淨係得我哋嘅記憶啦！！